Падчас лекцыі пагаворым пра тое, як Максім Багдановіч ствараў “Вянок” – ад асобных лірычных твораў да канцэптуальнай кнігі вершаў. Звернем увагу на сувязі паміж “Парыжскімі карцінамі” і віленскай урбаністыкай, а таксама на тое, як гукапіс і музычнасць робяцца важнай часткай паэтычнага ўздзеяння.

 

 

Падчас лекцыі разгледзім, як у творчасці Янкі Купалы і Уільяма Батлера Ейтса паўстае вобраз паэта – мага, снабачца і міфатворца. Пагаворым пра спробы вярнуць страчаныя скарбы Ірландыі і Беларусі, а таксама пра тое, як сімвалізм і заангажаванае мастацтва вядуць ад лірыкі да драматычнай паэмы і драматургіі.

 

Падчас лекцыі пойдзе гаворка пра настальгію як форму тэрапіі і духоўнага вяртання дадому. Параўнаем, як у “Пане Тадэвушу” і “Новай зямлі” перажываюцца турма, выгнанне, акупацыя і страта роднага свету, і як з сямейнай ідыліі вырастае нацыянальны эпас.

 

 

Падчас лекцыі звернемся да перасячэнняў беларускага і габрэйскага досведу ў паэзіі. Пагаворым пра Мойшэ Кульбака і ягоны “Райсн”, пра “алкагольныя ўцёкі” Тодара Кляшторнага ў паэме “Калі асядае муць”, а таксама пра “Пекла”, “Чысцец” і “Рай” Юлія Таўбіна.

 

Падчас лекцыі разгледзім дзве версіі аднаго твору як пралог і эпілог творчасці паэта. Пагаворым пра Куляшова як майстра споведзі і недагаворкі, пра ягоны “Маналог” – пра тое, што аўтар у ім сказаў і чаго не сказаў, – а таксама пра тое, як была створаная легенда вакол ягонага “галоўнага” верша.

Падчас лекцыі паспрабуем убачыць, як па-рознаму праявіліся змены эпохі адлігі ў паэзіі позняга Максіма Танка і найлепшых прадстанікоў “філалагічнага пакалення”. Пагаворым пра давераснёўскую і паслявераснёўскую “мадэль” Танка, пра паэтыку Стральцова як сустрэчу прозы паэта і паэзіі празаіка, а таксама пра легенды і міфы вакол постаці Рыгора Барадуліна – “багемнага”, “патрыятычнага”, “фрывольнага” і “духоўнага”.

 

 

Падчас лекцыі паразмаўляем пра аўтарскія жанры Алеся Разанава і пра тое, як адзін з галоўных беларускіх мадэрністаў пашыраў межы паэтычнай мовы. Асобна спынімся на ягоных паэтычных узнаўленнях і на тым, як беларускі паэт пісаў “літоўскую класіку”.

 

Падчас лекцыі разгледзім жаночую лінію ў беларускай паэзіі – ад супраціву да розных фомаў творчага эскапізму, ад асабістай інтанацыі да культурнага выкліку. Пагаворым пра Ларысу Геніюш як паэтку беларускага супраціву, пра таямніцуо маўчання Яўгеніі Пфляўмбаум і пра загадкі жыцця, смерці і творчасці Яўгеніі Янішчыц – “(не)прыручанай птушкі” беларускай лірыкі.

 

Падчас лекцыі пагаворым пра тое, як беларуская паэзія выходзіць за межы кнігі і становіцца музыкай, акустычным выказваннем ды сцэнічным перформансам. У цэнтры ўвагі будуць Міхал Анемпадыстаў як рок-дызайнер Беларусі, Уладзь Лянкевіч як сучасны філамат і “ангста-рэп” Віталя Рыжкова.

 

Падчас лекцыі звернемся да беларускай паэзіі 2020-х – часу маршаў і двароў, надзеі і разлому. Пагаворым пра турэмную лірыку, пра паэзію выгнання і ўнутранай эміграцыі, а таксама пра тое, як у вершах гэтага часу адбіваліся досвед несвабоды і пошук волі.